[الرهيب]

#رسالة_إلى_مراهق
#رسالة_إلى_مراهقة
#كيف_أتعامل_مع_غضب_أمي_الدائم
#كيف_أتعامل_مع_عصبية_أبي

أصدقائي وصديقاتي المراهقين والمراهقات..
لا يخفى عليكم ان احنا الكبار للأسف الشديد بقينا عصبيين زيادة عن اللزوم أحيانا.. وأحيانا بنطلع الغضب دا بشكل لا إرادي معاكم.. انهاردة انا عايزة اشرحلكم وجهة نظر بابا وماما واقترح عليكم تتصرفوا معاهم ازاي في حالة الغضب
بس خليني اعرفكم المعلومات الجاية

🔸#أولا: فترة المراهقة اللي انتوا بتمروا فيها بتخليكم انتو #حساسين جدا نتيجة تغير الهرمونات و دا في الصبايا والشباب

🔸#ثانيا: في فترة المراهقة دي بيكون عندكم ميل #للهزار والمزح اللي الكبار بيعتبروه سخافة او تقل دم. ونادراً ما بيضحكوا عليها

🔸#ثالثا: في فترة المراهقة بتكونوا عايزين مساحة اكبر من #الحرية عشان انتو شايفين انكم كبرتوا (ودي حقيقة)

🔸#رابعا: اخطاؤكم في مرحلة المراهقة بتكون #متكررة ورا بعض ما بتديش فرصة للكبار انهم يتعاملوا معاكم بدون انتقاد.. و الأخطاء دي بتكون نتيجة التسرع في أوقات كتير او للأسباب التلاتة اللي ذكرناها فوق دي

⁉️طيب انا ليه بقولكم الكلام دا.. عشان تعرفوا نفسكم وتفهموا تصرفاتكم دي جاية منين ولما تفهموا نفسكم هايبقى سهل عليكم انكم الى حد ماتسيطروا على بعض التصرفات او تقدروا توضحوها لبابا وماما

❓طب هل بابا و ماما مش عارفين الكلام دا؟

لا عارفينه بس خوفهم عليكم (اللي أحيانا بيكون زيادة شوية بصراحة) بيخليهم مش عارفين يتحكموا في اعصابهم.. وانا بدوري باشرح كتير كيفية بناء علاقة معاكم.. بس لأن العلاقة دي طريق ذو اتجاهين.. رايح جاي يعني.. فانتم كمان عليكم دور.. عليكم دور انكم تمدوا ايدكم لهم او تتقبلوا ايدهم الممدودة لكم.

💢 كيف تبني علاقة مع ماما و بابا:

1⃣الاحترام.. والحفاظ على الاحترام.. دي نقطة جوهرية جدا بتفرق كتييير في تعاملكم معاهم.. على الرغم اني متفهمة ان أحيانا مش بيكون قصدكم الصوت يعلى، او حركة الايد او حتى بعض المصطلحات اللي بتتبادلوها مع اصدقاءكم، لو بدر منكم أي من هذه التصرفات دون قصد (أو بقصد) فوراً توقفوا عن الكلام واعتذروا.. وقول اسف ما كنتش اقصد عدم احترام.. لان في المرحلة دي الاب والام بيهمهم كتير ان اللي اتربيتوا عليه من احترام يكون موجود وبيخافوا جدا وبيغضبوا جدا لو حسوا انكم بتتغيروا للاسوأ و دا حقهم.. #تخيل انت كدا زارع زرعة ومهتم بيها وفجأة لقيتها بتدبل او بتضيع منك. هاتخاف وتبتدي تحاول قصارى جهدك انك ترجعها مرة تانية تبقى كويسة عشان انت بتحبها وعشان تعبك.

2⃣في ساعة صفا فهموا بابا وماما (أو اللي بيقدر يتفاهم منهم) انه انت لما بتكون غضبان محتاج بس مساحة من الوقت وهاترجع تاني تتفاهم. وبالتالي لما توصل لمرحلة غضب وعشان نحافظ على علاقاتنا هاتستأذن وتقول طب بعد اذنكم هانتكلم بعدين.. لو بابا وماما مش من النوع اللي ممكن يتقبل دا.. ممكن تستأذن انك تروح الحمام قولهم ثانية رايح الحمام وجاي.. و روح او روحي اتنفسي او حتى لو عايزين تعيطوا عيطوا وفرغوا الشحنة وارجعو تاني

3⃣الحريات اللي بتطالب بيها قدامها مسؤولية كبيرة جدا، ما تفتكرش اننا الكبار بنعمل اللي احنا عايزينه طول الوقت.. أوقات كتيرة بنكون عايزين نقعد ما ننزلش الشغل وبننزل عشان الالتزام.. أوقات كتير بيبقى نفسنا ننام ساعة زيادة ومش بننام عشان ورانا مسؤوليات، أوقات كتير بنتعامل مع ناس نفسنا نقولهم اغربوا عن وجهنا بس بنتعامل عشان الاجتماعيات.. الحريات قدامها مسؤوليات فقبل ما تطلب حريتك اعرف مسؤوليتك

4⃣ بتسأل طب وانا ايه اللي جابرني على كدا ما انا اعتزل كل دا واقعد في اوضتي وليذهب الكوكب الى الجحيم.. معاك حق.. بس انت بتقول كدا دلوقت عشان انت غضبان من تصرفاتهم.. بس في النهاية لما تبتدي تهدى شوية هاتعرف ان الحياة دي مش لطيفة اوي.. ولا انت تستحقها ولا بابا وماما يتسحقوها وممكن نعيش بسلام اكثر

5⃣بابا وماما اللي مش بياكل معاهم الكلام دا. لما يلاقوك #بتحاول معاهم.. صدقني هايطمنوا ويبتدوا يمدوا ايدهم كمان فما تيأسش.. بل اقولكم حاجة.. هم نفسهم فاكرين انكم ما بيمشيش معاكم الكلام العاقل دا.. بس انا مؤمنة بيكم وبعقلكم

6⃣الرسايل ودي نقطة اتكلمت عليها امبارح.. الرسايل لو مش قادر تتواصل هايقرأوها ويديهم فرصة يفكروا ..قول بوضوح انت محتاج ايه

7⃣ بكرة هاكمل معاكم خطوات عملية ساعة الصراع.. واعرفوا ان بابا وماما بيقرأوا الكلام دا كمان .. يعني عايزين يبقى بينكم صداقة..وعلاقة مبنية على الاحترام.. فما تيأسوش..

🔴 على الرغم ان مرحلتكم العمرية مرحلة صعبة.. الا اني عارفة انكم شباب و بنات زي الورد.. تسروا القلب و العين.. و مؤمنة على الرغم من تقلباتكم المزاجية دي.. الا انكم طيبين و قادرين على التغيير اكثر من الكبار

القاكم غدا ان شاء الله

و على فكرة انا باحبكم جدا جدا جدا.. بدون ما اعرفكم كلكم.. ومساءكم سعيد..

دعاء صفوت🌸