[تــرف]

احس كني فاقده كل ذاتـــي .. مدري وش الي بعدها يحتريـني

من غاب الي حضوره غناتـي .. وانا ادري ان اقصى المواجع تبيني


حاولت الملم بالقصايد شتاتي .. اثر القصايد همها محتويني

وشلون ابهرب من بعض ذكرياتي .. دامه جميع الذكريات وحنيني

من قبل ما البس برقعي او عباتي .. وغلاه لابس نبضة القلب فيـني

كنت افتخر قدام كل البناتـي .. واقول هذا الي ابيه ويبـيني

وكان الغرور بداخلي من صفاتي .. وكان الجنون بدنيته يعتريني

واليوم والله راس مال سكاتـي .. نظرة وداع ساكنه وسط عيني

اعيش فيها مابقى من حياتـي .. ماهمني من ذنبها وش يجينـي

لابد ما يوم يجي به وياتي .. ويشوف بعيونه سوايا سنيـني