سل الخناجر وإظهر الغدر والغلّ
واكتشف لثام الزيف وأحرق قناعه
وجرب هوى غـــيري وإذا تم بطّـل
وأرجع ودور من يسرك سماعه
وإلى اكتشفت انه من الحب معتّل
لاتهمله واطعنه في ظرف ساعه
خله يذوق الموت وأرحل وبدّل
لوّن حياتك وخلّ عندك مناعه
لاجتك حواء قايله إنت مختّل
قل مالحواء في غرامي شفاعه
يعني إلي هي حبها غير معتّل
مافيه مكر ولايعرف الوضاعه؟!!
يعني إذا اعطت حبها لك مكمّل
وانت الذي حبك تعده صناعه !!
يعني إذا حبتك تصبح لها الكل؟!!
تبيع غيرك وإنت سمع وطاعه
كم ضيعت حواء من الناس بالظلّ؟!
وكم دمرت بيت وخانة جماعه؟!
وكم بنت قدامك تزين وتجمّل
وعند غيرك تنفضح بالخلاعه !!
تسهر مع هذا وتحكي مع الكل
وهذا بكلمه ترتمي في ذراعه!!
وكم ضيّع آدم بالهوى والتمثيل
عذرا وهي تحسبه قمة وداعه!!!
تنقاد له مافكرت عقب بالحل
تمشي بكيفه كنّها من متاعه !!
وكم من شريفه صعب فيها التغزّل
حتى الخيال يصد من قناعـــــــــــه
لو كنت ناويها على الشر تخجلّ
من فوق يحميها الإله بشعاعه
وكم من شريف بالغلط ماتقبل
لو هي القمر ماهزته بإقناعه
ماغرته في حسنها والتدلل
ما لامست قلبه ولا احيت صداعه
آدم مثل حواء إلي منّه استلّ
سيف الغدر يصعب عليه إنتزاعه
طبع الخيانه بينهم لا تغلغل
بسبابهم كم شخص يعلن ضياعه
هذا يعيش العمر لوطال في ذلّ
وهذي تمنى لو بعد في الرضاعه
وهذا يموت من القهر قبل يعتلّ
وهذي تحاول تنتحر في بشاعه
آدم وحواء مثل ماقيل من قبل
كلٍّ يشوف الناس بأعين طباعه