[الساحل]

قالوا تحبه قلت ماهوب بالحيل
بس انه اغلا شوي من نور عيني

يسوى جميع الجيل الاول وها الجيل
واحبابي الماضين والمقبليني

شوقي له اعظم من ظمى الارض للسيل
واشفق عليه اكثر من ام الجنيني

واحتاج له حاجة ثرى مصر للنيل
وعليه اغار اكثر من الوالديني

اشتاق له شوق المحبين لليل
وارتاح له راحت دموع الحزيني

لاصار جنبي لو سنه وقتي بخيل
ولو غاب لو لحظه صارت سنيني

قالوا يحبك قلت هذا هو الويل
ماودي انشد ثم رفضه يجيني

واهدم رجاي بدبرتي مثل ماقيل
والأفضل احيا بالامل لو لحيني

ياحبكم ياناس للقال والقيل
الله يجازي جملت العاذليني

خلوني احيا في الوهم يالعواذيل
وش دخلكم والامر بينه وبيني

الساحل