عايز تنجح وتحقق اهدافك بشكل اسرع؟
 

عارف "النيش" اللي موجود فى كل بيت واللي ملهوش اي تلاتين لازمه وياما اتريقنا عليه فى حين ان فى بيوتنا ما هو ادعى للاستغراب اكتر من "النيش"

على سبيل المثال لا الحصر فى بيوتنا كام علبة مربى او زجاجة عصير او حتى كيس بلاستيك موجود بلا اي داعي تحت بند ان ممكن بكره نحتاجه ونعيد استخدامه او يفيدنا فى اي حاجه ؟

من اهم قواعد النجاح
واللي لو مشيت بيها هترتاح كتير فى حياتك هي
" let it go and move on "

يعني بالبدي كده سيبها بقى وعديها وتخطاها وكمل حياتك ... مهو طول ما انت ماشي فى حياتك تحتفظ بكل حاجه مهما كانت تافهه هتلاقي مع الوقت ان اغلب مساحة بيتك اتحولت لمعرض روبابيكيا

واسوأ انواع الروبابيكيا هي الروبابيكيا الفكريه والنفسيه

طول ما انت ماشي فى حياتك عمال تشيل وتخزن كلام وافكار وعلاقات ومواقف ملهاش اي لازمه ومع الوقت دماغك بقت معرض روبابيكيا

فكره مش كامله هنا واخده مساحه
على موقف مؤذي على علاقه مشوهه هناك

ارجوك اعمل جرد لدماغك فى اسرع وقت

المعلومات/المواقف/الكورسات/الافكار/العلاقات الجميله المركونه والتراب عليها نضفها ولمعها وجربها واستخدمها

المعلومات/المواقف/الكورسات/الافكار/العلاقات المشوهه والمؤذيه او على الاقل ملهاش لازمه ولا قيمه وعفنت ارميها واتخلص منها فورا ونضف مكانها

فضي مساحات لافكار/معلومات/علاقات/مواقف وناس جديده ودي هتكون اول خطوه فى طريق نجاحك وهتحس براحه نفسيه كبيره جدا

نضف بيتك
نضف علاقاتك
نضف دماغك
نضف افكارك
نضف صحبتك
نضف محيطك الاجتماعي

الشخص او الحاجه او الشيء اللى واخد اي حيز فى حياتك بلا داعي او قيمه اتخلص منه فورا وانت الكسبان

وتذكر القاعده الذهبيه دي ...
لو تكلفة الاحتفاظ بالاشياء اغلى من
تكلفة الاستغناء عنها فالاستغناء عنها اولى

قوتك فى قدرتك على تخطي
الافكار/الاشياء/المواقف/العلاقات المؤذيه
واللي بلا قيمه ... قوتك الحقيقيه فى انك تقدر
تقول it's enough يعني كفايه
و مقدرتك على " let it go and move on "

عايز تنجح وتبقى شاطر ولعيب
قوم بسرعه وتخلص من الكراكيب
عمرو سعد